ZAMANIN QISA TARİXİ. BÖYÜK PARTLAYIŞDAN QARA DƏLİKLƏRƏ QƏDƏR

Stiven Uilyam Hokinq dünya şöhrətli nəzəriyyəçi-fizik və kosmoloq olmaqla yanaşı, elmin populyarlaşması üzrə tanınmış alimlərdən biri kimi tanınır. Hokinqin elmi çalışmalarının başlıca mövzusu dünyanın yaranması, bu yaranışa başlanğıc verdiyi güman edilən Böyük Partlayış və həmçinin, qara dəliklər adlanan fiziki hadisələrlə bağlıdır. Bununla yanaşı, Hokinqin elmi fəaliyyəti ümumi nisbilik nəzəriyyəsi ilə kvant mexanikasını bir araya gətirməklə, Kainat üçün vahid bir elmi nəzəriyyə yaratmaq istiqamətinə yönəlib. İlk dəfə 1988-ci ildə çap olunan, sonrakı nəşrlərində yenidən işlənib təkmilləşdirilən “Zamanın qısa tarixi kitabı nəşr olunduğu gündən indiyədək 10 milyondan artıq tirajla çap edilib və bu gün də öz aktuallığını qoruyub saxlayaraq, elmi-kütləvi əsərlər sırasında seçilən bir bestsellerə çevrilib. Kitabın maraqlı cəhətlərindən biri – burada Eynşteynin məşhur E=mc2 tənliyindən başqa heç bir formuldan istifadə olunmayıb. Stiven Hokinqin özünün də qeyd etdiyi kimi o, bu kitabında mürəkkəb riyazi-fiziki hesablamalardan istifadə etməməklə, geniş oxucu çevrəsinin anlaya biləcəyi bir dildə, müasir elmin dünyanı dərk etmək yolunda keçdiyi mürəkkəb yolu və gəldiyi son nəticələri incələməyə çalışıb. Oxuyacağınız bu kitabın dünyagörüşünüzün zənginləşməsində və yaşadığımız Kainatın sirlərinə bələd olmağınızda yetərincə böyük təsiri olacağına inanırıq.