ARTAKSERKS VƏ MİDİYA TÜRKLƏRİ

Yazıçı, filosof, publisist və tarixçi Əlisa Nicatın “Artakserks romanında bir nəfərin etnosun başında ağır və sağalmaz bir çiban kimi bitib onu xoş günün üzünə həsrət qoyması tarixi-fəlsəfi-bədii boyalarla təsvir olunur və əsərdən belə bir nəticə çıxır ki, şərə meydan açmağa imkan verən və hakimiyyət rəmzinin hər cür haqsızlıq və cinayətlərinə dözən millətin adı, BMT qarşısında bayrağı dalğalansa belə, heç vaxt, heç yerdə millətlər cərgəsində çəkilməyəcək. Yeni eradan əvvəl VI yüzilliyin 40-cı illəri idi. Xoşbəxt günlər keçirən Midiya türklərindən birdən-birə bəxt üz döndərdi. Haçansa, tarixin hansı bir dönüşündəsə hiyləgər, məkrli, yaramaz, acqurd və qəddar bir tip, bir məxluq Midiyada hakimiyyəti ələ keçirdi. Bu, Artakserks idi. Artakserks sözünün mənası “uzun qol deməkdir və doğrudan da, bu adamın əli çox uzun idi və biz bunu bütün tarix ərzində dönə-dönə görəcəyik.